ബാഗ്ദാദ്: ഇസ്ലാമിക തീവ്രവാദികളുടെ ഭീഷണിയെത്തുടർന്ന് പലായനം ചെയ്ത ക്രൈസ്തവര്‍ ഉള്‍പ്പെടെയുള്ളവര്‍ക്ക് സ്വദേശത്തേക്ക് മടങ്ങിയാല്‍ സംരക്ഷണം നല്‍കുമെന്ന ഉറപ്പു ഇറാഖി പ്രധാനമന്ത്രിയില്‍ നിന്നു ലഭിച്ചതായി കൽദായ പാത്രിയാർക്കീസ്. രാജ്യത്തേക്ക് മടങ്ങാൻ തീരുമാനിക്കുന്ന ഇറാഖികൾക്ക് പുതിയ വീടും ഭൂമിയും നല്‍കുമെന്ന വാഗ്ദാനം അടുത്തിടെ ഇറാഖ് പ്രധാനമന്ത്രി അലി ഫാലിഹ് അൽ സെയ്ദിയുമായി നടന്ന കൂടിക്കാഴ്ചയ്ക്കിടെ ലഭിച്ചതായി ബാഗ്ദാദിലെ പാത്രിയാർക്കീസ് ​​പോൾ മൂന്നാമൻ നോന പറഞ്ഞു.

നല്ലൊരു അന്തരീക്ഷം രൂപപ്പെടുന്നത് മികച്ചൊരു സമ്പദ്‌വ്യവസ്ഥയിൽ നിന്നാണെന്ന് അൽ സെയ്ദി ഉറച്ചു വിശ്വസിക്കുന്നുണ്ടെന്നും ആളുകൾക്ക് ജോലി ചെയ്യുന്നതിൽ സുരക്ഷിതത്വം തോന്നുകയും ഭാവിയിൽ വിശ്വാസം ഉണ്ടാവുകയും ചെയ്താൽ അവർ തിരിച്ചുവരുമെന്നും പാത്രിയാർക്കീസ് ​​പറഞ്ഞു. അതിന് ഉതകുന്ന നയപരമായ സമീപനം പ്രധാനമന്ത്രിയില്‍ നിന്നു ലഭിച്ചിട്ടുണ്ടെന്നും പാത്രിയാർക്കീസ് വെളിപ്പെടുത്തി. വിദേശത്തുനിന്ന് ഇറാഖിലേക്ക് മടങ്ങാൻ ആഗ്രഹിക്കുന്ന ക്രിസ്ത്യാനികൾ ഉൾപ്പെടെ പത്തുലക്ഷത്തോളം കുടുംബങ്ങൾക്ക് - ഭൂമിയും പുതിയ വീടും ലഭിക്കാൻ അർഹതയുണ്ടായിരിക്കുമെന്ന് പ്രധാനമന്ത്രി വ്യക്തമാക്കി.

കാൽ നൂറ്റാണ്ട് മുമ്പുണ്ടായിരുന്നതിനേക്കാൾ വളരെ കുറഞ്ഞ എണ്ണത്തിലേക്ക് ചുരുങ്ങിപ്പോയതും, തങ്ങളുടെ ചരിത്രപരമായ സ്വദേശം വിട്ടുപോകാൻ നിരന്തരമായ സമ്മർദ്ദം നേരിടുന്നതുമായ ഇറാഖിലെ ക്രിസ്ത്യൻ സമൂഹത്തിന് ഇത് ഒരു പ്രതീക്ഷ നൽകിയേക്കാം. വിദേശത്തുനിന്ന് മടങ്ങിവരാൻ സന്നദ്ധരായ ഇറാഖി ക്രിസ്ത്യാനികളിൽ നിന്ന് ഇറാഖിലേക്ക് നിക്ഷേപം വരണമെന്നാണ് പ്രധാനമന്ത്രി ആഗ്രഹിക്കുന്നത്. ഇക്കാര്യത്തില്‍ തങ്ങളുടെ പ്രതീക്ഷ പങ്കുവെച്ചതായി പാത്രിയാർക്കീസ് വ്യക്തമാക്കി. കൽദായക്കാർ നിക്ഷേപകരായി തിരിച്ചെത്തിയാൽ, അവർ മറ്റുള്ളവർക്കും അവസരങ്ങൾ സൃഷ്ടിക്കുമെന്നു പാത്രിയാർക്കീസ് ​​ഉറപ്പുനല്‍കി.

ഇന്ന് ഇറാഖിൽ ഏകദേശം 1,50,000 - 2,50,000 ഇടയ്ക്കു ക്രിസ്ത്യാനികൾ മാത്രമേ അവശേഷിക്കുന്നുള്ളൂ; 2003-ൽ അവിടെയുണ്ടായിരുന്ന 15 ലക്ഷം പേരുമായി താരതമ്യം ചെയ്യുമ്പോൾ ഇത് വലിയൊരു കുറവാണ്. 2014-ൽ ഇസ്ലാമിക് സ്റ്റേറ്റ്സ് നടത്തിയ ആക്രമണത്തെത്തുടർന്ന് ഏകദേശം 1,20,000 ക്രിസ്ത്യാനികൾക്ക് ഒറ്റരാത്രികൊണ്ട് നിനവേ താഴ്വരയില്‍ നിന്ന് പലായനം ചെയ്യേണ്ടിവന്നു. തകർക്കപ്പെട്ട തങ്ങളുടെ വീടുകളിലേക്ക് മടങ്ങുന്നതിനു പകരം, ആയിരക്കണക്കിന് ക്രൈസ്തവര്‍ വിവിധ രാജ്യങ്ങളിലേക്ക് കുടിയേറുകയായിരിന്നു.

♦️ 'പ്രവാചകശബ്‌ദ'ത്തെ സഹായിക്കാമോ? ♦️