അബൂജ: ആഫ്രിക്കന്‍ രാജ്യമായ നൈജീരിയായില്‍ ക്രിസ്ത്യൻ സമൂഹങ്ങളെ വേട്ടയാടുകയാണെന്നും രാജ്യത്തെ വിശ്വാസികള്‍ കഴിയുന്നത് കടുത്ത അരക്ഷിതാവസ്ഥയിലാണെന്നും വിവിധ ക്രൈസ്തവ സഭകളുടെ കൂട്ടായ്മയായ 'ക്രിസ്ത്യന്‍ അസോസിയേഷന്‍ ഓഫ് നൈജീരിയ'. നിരവധി ക്രൈസ്തവ സമൂഹങ്ങൾക്ക് നേരെ കടുത്ത ആക്രമണങ്ങൾ, ജീവഹാനി, ആരാധനാലയങ്ങളുടെ നാശം എന്നീ നിരവധി പ്രതിസന്ധികളാണ് രാജ്യത്തെ ക്രൈസ്തവര്‍ നേരിടുന്നതെന്ന് സംഘടന ചൂണ്ടിക്കാട്ടി. ക്രൈസ്തവര്‍ക്ക് നേരെയുള്ള കൊലപാതകങ്ങളുടെയും കുടിയിറക്കത്തിന്റെയും വ്യാപ്തി ഭയാനകമായ അനുപാതത്തിലെത്തിയെന്നും സർക്കാരിൽ നിന്നും സുരക്ഷ ഏജൻസികളിൽ നിന്നും അടിയന്തരവും സുതാര്യവുമായ നടപടി ആവശ്യപ്പെടുകയാണെന്നും സംഘടന കഴിഞ്ഞ ദിവസം പുറത്തിറക്കിയ പ്രസ്താവനയില്‍ പറയുന്നു.

നൈജീരിയയുടെ ചില ഭാഗങ്ങളിൽ, പ്രത്യേകിച്ച് വടക്കൻ പ്രദേശങ്ങളിൽ, നിരവധി ക്രിസ്ത്യൻ സമൂഹങ്ങൾ ഗുരുതരമായ ആക്രമണങ്ങളും, ജീവഹാനിയും നേരിട്ടുണ്ടെന്ന് സംഘടന സ്ഥിരീകരിച്ചു. പ്രദേശം പരിഗണിക്കാതെ, ഓരോ പൗരനെയും സംരക്ഷിക്കാൻ സർക്കാരും സുരക്ഷാ ഏജൻസികളും നിർണായകമായി പ്രവർത്തിക്കേണ്ടതിന്റെ അടിയന്തിര ആവശ്യകതയെക്കുറിച്ചുള്ള വേദനാജനകമായ ഓർമ്മപ്പെടുത്തലുകളാണ് ഇവ. ക്രിസ്ത്യൻ സമൂഹങ്ങളെ തുടർച്ചയായി ലക്ഷ്യമിട്ടുള്ള ആക്രമണങ്ങളും അധികാരികളുടെ മന്ദഗതിയിലുള്ള പ്രതികരണത്തെയും അപലപിച്ചാണ് ദേശീയ പ്രസിഡന്റ് ആർച്ച് ബിഷപ്പ് ഡാനിയേൽ ഒകോ ഒപ്പിട്ട പ്രസ്താവന പുറത്തിറക്കിയത്.

കൊലപാതകങ്ങൾ അവസാനിപ്പിക്കുന്നതിനും, ദുർബലരായ ക്രിസ്ത്യൻ സമൂഹങ്ങളെ കുടിയിറക്കലിൽ നിന്ന് സംരക്ഷിക്കുന്നതിനും, കുറ്റവാളികൾ നിയമത്തിന്റെ മുന്നില്‍ കൊണ്ടുവരുന്നത് ഉറപ്പാക്കുന്നതിനും അടിയന്തിരവും സുതാര്യവും നീതിയുക്തവുമായ നടപടി സ്വീകരിക്കണമെന്ന് സർക്കാരിനോടും സുരക്ഷാ ഏജൻസികളോടും വീണ്ടും ആവശ്യപ്പെടുകയാണ്. അക്രമത്താൽ ഛിന്നഭിന്നമായ ക്രൈസ്തവ കുടുംബങ്ങളുടെ വേദന ഒരിക്കലും വെറും സ്ഥിതിവിവരക്കണക്കുകളായി കണക്കാക്കരുത്. വർഷങ്ങളായി, നൈജീരിയയിലെ ക്രൈസ്തവര്‍ക്ക് എതിരായ പീഡനത്തിലേക്ക് ദേശീയവും അന്തർദേശീയവുമായ ശ്രദ്ധ ആകർഷിക്കുന്നതിനായി അസോസിയേഷൻ നിരവധി ശ്രമങ്ങള്‍ നടത്തുണ്ടെന്നും സംഘടന വ്യക്തമാക്കി. ക്രൈസ്തവ വംശഹത്യയില്‍ ഇടപെടല്‍ ആവശ്യപ്പെട്ട് ഹേഗിലെ അന്താരാഷ്ട്ര ക്രിമിനൽ കോടതിക്ക് സംഘടന കത്ത് കൈമാറിയിരിന്നു.

⧪ പ്രവാചകശബ്‌ദത്തിന്റെ ശുശ്രൂഷകളില്‍ ഭാഗഭാക്കാകുമോ? ‍