വാഷിംഗ്ടൺ ഡി.സി: രാജ്യത്തിന്റെ 250-ാം വാർഷികത്തിന് മുന്നോടിയായി, സമ്പൂര്‍ണ്ണ ബൈബിള്‍ ഉറക്കെ വായിക്കാൻ 495 ക്രൈസ്തവ പ്രതിനിധികള്‍ വാഷിംഗ്ടൺ ഡി.സി.യിൽ ഒത്തുകൂടും. ക്രൈസ്തവരെ പ്രാർത്ഥിക്കാനും വോട്ടുചെയ്യാനും പൗരജീവിതത്തിൽ ഏർപ്പെടാനും പ്രോത്സാഹിപ്പിക്കുന്നതിന് വേണ്ടി ടെക്സസ് ആസ്ഥാനമായി സ്ഥാപിക്കപ്പെട്ട 'ക്രിസ്റ്റ്യൻസ് എൻഗേജ്ഡ്' എന്ന സംഘടനയാണ് ഇതിനു ചുക്കാന്‍ പിടിക്കുന്നത്. ദേശീയ ബൈബിള്‍ വായന യജ്ഞത്തിന്റെ ഭാഗമായാണ് 'അമേരിക്ക റീഡ്സ് ദി ബൈബിൾ' എന്ന പേരില്‍ പരിപാടി സംഘടിപ്പിക്കുന്നത്.

ഏപ്രിൽ 19 മുതൽ 25 വരെ, കത്തോലിക്കർ ഉൾപ്പെടെയുള്ള വിവിധ പ്രഭാഷകർ സമ്പൂര്‍ണ്ണ ബൈബിള്‍ വായന യജ്ഞത്തിനായി ബൈബിൾ മ്യൂസിയത്തിൽ ഒത്തുകൂടുമെന്ന് സംഘാടകര്‍ പറഞ്ഞു. രാഷ്ട്രത്തിന്റെ സ്ഥാപക ആദർശങ്ങളുടെ ആത്മീയ ആഘോഷമായും ഇന്നും നങ്കൂരമിടുന്ന സത്യം വീണ്ടും കണ്ടെത്താനുള്ള ആഹ്വാനമായുമാണ് തുടക്കം മുതൽ അവസാനം വരെ ബൈബിള്‍ വായനയജ്ഞം നടത്തുന്നതെന്ന് പരിപാടിയുടെ സംഘാടകർ വ്യക്തമാക്കി.

ഏപ്രിൽ 18ന് നൂറിലധികം മിനിസ്ട്രികളില്‍ നിന്നുള്ള നേതാക്കൾ ഒരാഴ്ച നീണ്ടുനിൽക്കുന്ന ആഘോഷത്തിനായി ഒത്തുകൂടും. ഏപ്രിൽ 19 ന് മ്യൂസിയത്തിൽ പാരായണം ആരംഭിക്കും, എല്ലാ ദിവസവും രാവിലെ 9 മുതൽ രാത്രി 9 വരെ പ്രഭാഷകർ വായന തുടരും. ഇത്തരത്തില്‍ ഒരു ആഴ്ചയ്ക്കുള്ളിൽ ബൈബിള്‍ വായന പൂർത്തിയാക്കുവാനാണ് ലക്ഷ്യമിടുന്നത്. ശിഷ്യത്വം, സുവിശേഷവൽക്കരണം, കത്തോലിക്കാ വിശ്വാസം എന്നിവയിൽ ശ്രദ്ധ കേന്ദ്രീകരിക്കുന്ന പുസ്തകങ്ങളുടെ രചയിതാവായ കത്തോലിക്കാ എഴുത്തുകാരൻ അലൻ റൈറ്റ് ഉള്‍പ്പെടെയുള്ളവര്‍ ബൈബിള്‍ വായനയുടെ ഭാഗമാകും.

സൂസൻ ബി. ആന്റണി പ്രോലൈഫ് സംഘടനയുടെ അമേരിക്ക പ്രസിഡന്റ് മാർജോറി ഡാനെൻഫെൽസർ, പ്രസിഡന്റിന്റെ ഉപദേഷ്ടാവ് ക്രിസ്റ്റി മക്‌ക്രറി, പ്രോലൈഫ് അഭിഭാഷക എന്നിവരുൾപ്പെടെ പ്രോലൈഫ് നേതാക്കളും കത്തോലിക്കാ നടിയും എഴുത്തുകാരിയുമായ പട്രീഷ്യ ഹീറ്റൺ, അമേരിക്ക റീഡ്‌സ് ദി ബൈബിൾ ദേശീയ വക്താവും നടിയുമായ കാൻഡേസ് കാമറൂൺ എന്നിവരുൾപ്പെടെ വിവിധ ക്രിസ്ത്യൻ പശ്ചാത്തലങ്ങളിൽ നിന്നുള്ളവരും തിരുവെഴുത്തുകൾ വായിക്കും.

♦️ 'പ്രവാചകശബ്‌ദ'ത്തെ സഹായിക്കാമോ? ♦️