ലാഹോര്‍: മതന്യൂനപക്ഷങ്ങള്‍ക്കു സംരക്ഷണം ഏര്‍പ്പെടുത്തുവാന്‍ പാക്കിസ്ഥാനിലെ ക്രിസ്ത്യൻ നിയമസഭാംഗം കൊണ്ടുവന്ന ബില്ലില്‍ പ്രതീക്ഷയോടെ വിശ്വാസി സമൂഹം. മതവിഭാഗങ്ങളെ ലക്ഷ്യംവെച്ചുള്ള ഭൂമി കൈയേറ്റവും നിയമത്തിന്റെ ദുർബലമായ നിർവ്വഹണവും സംബന്ധിച്ച ആശങ്കകൾക്കിടയിലാണ് ഫാൽബസ് ക്രിസ്റ്റഫർ എന്ന പഞ്ചാബ് നിയമസഭാംഗം നിയമനിർമ്മാണ ബില്‍ അവതരിപ്പിച്ചത്. പാക്കിസ്ഥാനിലെ ക്രിസ്ത്യാനികൾക്ക് വലിയ പ്രതീക്ഷ നൽകുന്ന ബില്ലാണിതെന്ന് ക്രൈസ്തവ സന്നദ്ധ സംഘടനയായ ഇന്റർനാഷണൽ ക്രിസ്ത്യൻ കൺസേൺ (ഐസിസി) പ്രസ്താവിച്ചു.

ക്രൈസ്തവ ദേവാലയങ്ങള്‍, സിഖ് ഗുരുദ്വാരകൾ, ഹിന്ദു ക്ഷേത്രങ്ങൾ എന്നീ ന്യൂനപക്ഷങ്ങളുടെ പരമ്പരാഗത മത സ്ഥാപനങ്ങൾക്ക് പൊതു ഫണ്ടുകൾ, ഗ്രാന്റുകൾ, കമ്മ്യൂണിറ്റി ഫണ്ടുകൾ, ന്യൂനപക്ഷ ക്ഷേമത്തിനായുള്ള വിദേശ സംഭാവനകൾ എന്നിവയിലൂടെ ഉടമസ്ഥതയിലുള്ളതോ ധനസഹായം നൽകുന്നതോ ആയ ഭൂമിക്കും കെട്ടിടങ്ങൾക്കും നിയമപരമായ സംരക്ഷണം നൽകുന്നതാണ് ബില്‍. പുറമേ നിന്നുള്ളവരുടെ ഭൂമി കൈയേറ്റവും അനധികൃത അവകാശ വാദങ്ങളും തടയാൻ ഇത് സഹായിക്കുമെന്നാണ് ക്രൈസ്തവര്‍ ഉള്‍പ്പെടെയുള്ള ന്യൂനപക്ഷങ്ങളുടെ പ്രതീക്ഷ.

തർക്കത്തിലുള്ള അവകാശങ്ങൾ, കൈയേറ്റം, നിലവിലുള്ള നിയമങ്ങളുടെ മറവിലുള്ള അധിനിവേശം എന്നിവ കാരണം ന്യൂനപക്ഷങ്ങൾക്ക് സ്വത്ത് നഷ്ടപ്പെട്ട ദീർഘകാല പ്രശ്‌നങ്ങൾ പരിഹരിക്കുക എന്ന ആവശ്യമാണ് ബില്ലിലൂടെ ഫാൽബസ് ക്രിസ്റ്റഫർ ഉന്നയിക്കുന്നത്. പഞ്ചാബിലെ ന്യൂനപക്ഷ വിഭാഗങ്ങൾക്ക് കൂടുതൽ നിയമപരമായ സംരക്ഷണം ബില്‍ വാഗ്ദാനം ചെയ്യുന്നുണ്ട്. ബില്‍ അംഗീകരിക്കപ്പെട്ടാല്‍ പാക്കിസ്ഥാനിലെ ഏറ്റവും ജനസംഖ്യയുള്ള പഞ്ചാബ് പ്രവിശ്യയിലെ മതന്യൂനപക്ഷങ്ങളുടെ സ്വത്തിന് ശക്തമായ പ്രവിശ്യാതല നിയമ പരിരക്ഷകൾ സൃഷ്ടിക്കുമെന്നാണ് കരുതപ്പെടുന്നത്. അത്തരമൊരു നിയമം മറ്റ് പ്രവിശ്യകളെയും സ്വാധീനിക്കുമെന്നാണ് കരുതപ്പെടുന്നത്.

♦️ 'പ്രവാചകശബ്‌ദ'ത്തെ സഹായിക്കാമോ? ♦️