വത്തിക്കാന്‍ സിറ്റി: വാഷിംഗ്ടൺ ഡിസിയിൽ ഇന്നു ജനുവരി 23ന് നടക്കുന്ന 'മാർച്ച് ഫോർ ലൈഫ്' പ്രോലൈഫ് റാലിയില്‍ സംബന്ധിക്കുന്നവർക്ക് സന്ദേശവുമായി ലെയോ പാപ്പ. ജീവിക്കാനുള്ള അവകാശത്തിന്റെ സംരക്ഷണം മറ്റെല്ലാ മനുഷ്യാവകാശങ്ങളുടെയും ഒഴിച്ചുകൂടാനാവാത്ത അടിത്തറയാണെന്നും എല്ലാ അവകാശങ്ങളുടെയും അടിസ്ഥാനം ജീവിക്കുവാനുള്ള അവകാശത്തിന്റെ സംരക്ഷണമാണെന്നും പാപ്പ സന്ദേശത്തിൽ കുറിച്ചു.

വാസ്തവത്തിൽ, ഒരു സമൂഹം ആരോഗ്യകരമായി പുരോഗതി പ്രാപിക്കുന്നത്, മനുഷ്യജീവന്റെ പവിത്രത സംരക്ഷിക്കുകയും അതിനെ പ്രോത്സാഹിപ്പിക്കുന്നതിനായി സജീവമായി പ്രവർത്തിക്കുകയും ചെയ്യുമ്പോൾ മാത്രമാണെന്ന് പാപ്പ ഓർമ്മപ്പെടുത്തി. ജീവൻ അതിന്റെ എല്ലാ ഘട്ടങ്ങളിലും സംരക്ഷിക്കപ്പെടുന്നതിനു, പൗരന്മാരും രാഷ്ട്രീയ നേതാക്കളുമായുള്ള സംഭാഷണം ഉൾപ്പെടെ സമൂഹത്തിന്റെ എല്ലാ തലങ്ങളിലും ഉചിതമായ ശ്രമങ്ങളിലൂടെ പരിശ്രമിക്കണമെന്നും പാപ്പ ആഹ്വാനം ചെയ്തു.

സമാധാനത്തോടെ ഗർഭസ്ഥ ശിശുക്കളുടെ അവകാശങ്ങൾക്കു വേണ്ടി ജാഥ നടത്തുമ്പോൾ, എപ്പോഴും നമ്മോടുകൂടെ ഉണ്ടായിരിക്കുമെന്നു വാഗ്ദാനം ചെയ്ത യേശു ഏവർക്കും ഒപ്പമുണ്ടായിരിക്കുമെന്നു പാപ്പ എടുത്തു പറഞ്ഞു. അവർക്കുവേണ്ടി വാദിക്കുന്നതിലൂടെ, നമ്മുടെ ഏറ്റവും ചെറിയ സഹോദരീസഹോദരന്മാരിൽ അവനെ സേവിക്കാനുള്ള കർത്താവിന്റെ കൽപ്പനയാണ് ഏവരും നിറവേറ്റുന്നതെന്നും പാപ്പ കൂട്ടിച്ചേർത്തു. അമേരിക്കൻ ഐക്യനാടുകളുടെ പുണ്യവതിയായ അമലോത്ഭവ മറിയത്തിന്റെ പ്രാർത്ഥനകൾക്ക് ഏവരെയും സമർപ്പിച്ചുകൊണ്ടും, അപ്പസ്തോലിക ആശീർവാദം നല്കിക്കൊണ്ടുമാണ് പരിശുദ്ധ പിതാവിന്റെ സന്ദേശം സമാപിക്കുന്നത്.

⧪ പ്രവാചകശബ്‌ദത്തിന്റെ ശുശ്രൂഷകളെ സഹായിക്കാമോ? ‍